Barbón, sobro financiamientu autonómicu: "Nun vamos sofitar nada que vaiga en contra d'Asturies"

"Tamos en contra de la salida de cualquier comunidá autonómica del réxime común"

El presidente del Principáu, Adrián Barbón, remarcó esti vienres, tres el prealcuerdu algamáu ente'l PSC y ERC pa la investidura de Salvador Illa, que'l so Gobiernu "nun va sofitar nada que vaiga en contra de los intereses d'Asturies" en materia de financiamientu autonómicu.

"Asturies tien definida la so posición histórica. Tamos en contra de la salida de cualquier comunidá autonómica del réxime común y en contra del principiu d'ordinalidá que vien dicir que cada comunidá reciba lo mesmo que lo qu'apurre", señaló nuna rueda de prensa acompañáu polos conseyeros que conformen el Gobiernu de coalición ente PSOE y IX.

Barbón afitó que la postura d'Asturies "ye la de siempre" y ta sofitada nel alcuerdu algamáu con tolos grupos parlamentarios, sacantes Vox, y na 'Declaración de Santiago' roblada a finales de 2021, amás de nos resolvimientos del últimu congresu de la FSA y nel so programa electoral.

El xefe del Executivu asturianu consideró que'l modelu de financiamientu autonómicu rique d'una reforma "en fondura", porque ta "pervieyu", y tien d'encarase con una visión de construcción de "un verdaderu Estáu federal".